اسلام آباد(نیوزایجنسیاں)سیاسی بنیادوں پر تقرریوں کا معاملہ، تحریک انصاف نے کھیل کے اداروں کو سیاسی تقرریوں سے پاک کرنے کا فیصلہ کر لیا۔ذرائع کے مطابق تحریک انصاف نے صوبائی گورنرز کے بعد پاکستان کرکٹ بورڈ اور ہاکی فیڈریشن کی طرف رخ کر لیا ہے، چیئرمین کرکٹ بورڈ نجم سیٹھی کو بھی عہدے سے ہٹایا جائیگا کیونکہ ان کی تقرری نواز شریف نے سیاسی بنیاد پر کی تھی۔دوسری جانب پی ٹی آئی نے پاکستان ہاکی فیڈریشن کے صدر خالد سجاد کھوکھر کو بھی عہدے سے ہٹانے کا فیصلہ کر لیا ہے۔ ذرائع کا کہنا ہے کہ خالد کھوکھر کی تقرری بھی اہم لیگی شخصیت کے رشتہ دار ہونے کی بنیاد پر کی گئی تھی، اب پی ٹی آئی سیاسی طور پر ہونیوالی تقرریوں کو ختم کرے گی۔دوسری جانب عمران خان کے نئے وزیر اعظم بننے سے قبل ہی کرکٹ کی بعض شخصیات چیئرمین پی سی بی کی پوسٹ سنبھالنے کے خواب دیکھنے لگی ہیں، ان میں ایک پی ایس ایل فرنچائز کے مالک سمیت بعض سابق کرکٹرز بھی شامل ہیں، ذرائع کے مطابق بعض لوگوں نے عمران خان کی قریبی شخصیات کو یقین دلانا شروع کردیا ہے کہ ان سے بہتر انتخاب کوئی ثابت ہو ہی نہیں سکتا۔دوسری جانب لاہور میں واقع بورڈ آفس میں بھی گزشتہ روز حکومت کی تبدیلی کا چرچا رہا اور ملازمین تبادلہ خیال کرتے رہے کہ اس کا کس پر اثر پڑ سکتا ہے، چیئرمین نجم سیٹھی شام کو دفتر آئے اور معمول کے امور انجام دیے،قریبی ذرائع کے مطابق انھوں نے دیکھو اور انتظار کرو کی پالیسی اپنا لی ہے، وہ خود سے میدان نہیں چھوڑیں گے۔ادھر الیکشن کے دنوں میں بھی ذاکرخان، عمران خان کے آس پاس ہی دکھائی دیے، البتہ ذرائع کا کہنا ہے کہ انھیں چیئرمین کی ذمہ داری شاید ہی سونپی جائے، سابق کپتان کو اس بات کا اندازہ ہے کہ سب دونوں کی قربت سے واقف ہیں ایسے میں اگر کوئی بڑی ذمہ داری سونپی تو دوستی نبھانے کا الزام لگ جائے گا، ذاکر خود بھی چاہتے ہیں کہ ماضی کی پوسٹ پر ہی فعال ہو جائیں۔
